sexta-feira, 13 de julho de 2012

Rajoy elimina a paga de Nadal d’os funcionarios y puya l’IVA a o 21%

'No son unas midas agradables pero son imprescindibles', diz o president d'o gubierno espanyol
 
O president d'o gubierno espanyol, Mariano Rajoy, anuncia as midas d'austeridat que se veye obligau a imposar por a Unión Europea: l'IVA cheneral puyará d'o 18% a o 21%, y l'IVA reduciu, d'o 8% a o 10%. Se mantendrá l'IVA muit reduciu, ta productos de primera necesidat, en o 4%. Amás, i habrá un retalle d'o chornal d'os funcionarios, os de l'administración estatal, d'as comunidatz autonomas y os entes locals. Asinas l'ha confirmau Rajoy, que ha dito que 'no son unas midas agradables pero que son imprescindibles'.

'No podemos trigar, no tenemos ista libertat', ha recalcau Rajoy ta chustificar toda a serie de midas que ha anunciau, en que se bi incluyen tamién retalladas en a dependencia, en as prestacions por desemplego y una liberalización, u privatización en qualques casos, d'os sectors d'o transporte ferroviario y aeroportuario. 'Fa mal, pero l'hemos de fer porque gracias a istos sacrificios individuals podremos conservar tot ixo que compartimos', ha adhibiu o president espanyol.

Rajoy ha explicau por primera vegada a os diputaus d'o congreso o plan de rescate bancario europeu. L'obchectivo de deficit, que ha pasau estianyo d'o 5,3% a o 6,3% (ha d'estar d'o 3% o 2014) ye una concesión d'a Unión Europea a o gubierno espanyol, a cambeo d'aplicar decamín as midas que le exiche.

A UE remera a importancia d'os plans de reequilibrio d'as comunidatz autonomas, con qui o gubierno espanyol se reunirá chustament maitín ta estudiar os hispabonos a cambeo d'unas rigorosas condicions d'estalbio.

Nenhum comentário:

Postar um comentário